सांसद चौधरीलाई रिहाइ गर्न माग


राष्ट्रिय जनता पार्टी (राजपा) नेपालले निर्वाचित सांसद रेशम चौधरीलाई शीघ्र रिहाइ गर्न सरकारसँग माग गरेको छ ।

सोमबार शुरु भई आज सम्पन्न रापजा नेपालको राजनीतिक समितिको बैठकले सांसद चौधरीलगायत मधेश आन्दोलनका क्रममा विभिन्न जिल्लामा बन्दी बनाइएका नेता तथा कार्यकर्ताको मुद्दा फिर्ता गरी रिहाइ गर्न माग गरेको हो ।

बैठकले मधेश थरुहट आन्दोलनका क्रममा भएका ज्यादतीको छानविन गरी सत्यतथ्य जनसमक्ष ल्याउन सर्वोच्च अदालतका सेवानिवृत्त न्यायाधीश गिरिशचन्द्र लालको नेतृत्वमा गठित उच्चस्तरीय न्यायिक छानविन आयोगको प्रतिवेदन अविलम्ब सार्वजनिक गर्नसमेत माग गरेको छ ।

सरकार गठन हुँदाका बखत प्रधानमन्त्री केपी शर्मा ओलीले गर्नुभएका प्रतिबद्धताअनुसार यथाशीघ्र संविधान संशोधन गर्न बैठकले माग गरेको संयोजक महन्थ ठाकुरद्वारा जारी विज्ञप्तिमा जनाइएको छ ।

राजपा नेपालको विधान २०७४ को धारा–२२ (१०) मा “राष्ट्रिय जनता पार्टी नेपालको केन्द्रीय महाधिवेशन एक वर्षभित्र सम्पन्न गरिनेछ”, लेखिएकामा त्यसलाई “दुई वर्षभित्र सम्पन्न गरिनेछ” भनी संशोधन गर्ने निर्णय बैठकले गरेको छ ।

महाधिवेशन वैशाखमा

राजपा नेपालले पार्टीको महाधिवेशन २०७६ साल वैशाख ७, ८ र ९ गते सम्पन्न गर्ने निर्णय गरेको छ ।

बैठकले पार्टी अध्यक्ष मण्डलमा प्रस्तुत गरिएको पार्टीको मस्यौदा विधान परिमार्जन गरी अर्को बैठकमा पेश गर्न सर्वेन्द्रनाथ शुक्ल, लक्ष्मणलाल कर्ण र वृशेषचन्द्र लाल सम्मिलित तीन सदस्यीय विधान परिमार्जन समिति गठन गर्ने निर्णय गरेको छ ।

राजपा नेपालका केन्द्रीय सचिव तेन्जी लामा (छत्रपति) को असामयिक निधनप्रति गहिरो शोक प्रकट गर्दै बैठकले शोक सन्तप्त परिवारजनप्रति हार्दिक समवेदना प्रकट गरेको छ ।

पार्टी राजनीतिक समितिको अर्को बैठक यही असार २१ गते पुनः बस्ने छ ।


Write A Suggestion

%d bloggers like this: