७५औं प्रजातन्त्र दिवसको उपलक्ष्यमा श्री ५ महाराजाधिराज ज्ञानेन्द्र वीर बिक्रम शाह देव सरकारबाट देश र जनताको नाममा भएको सम्बोधन, जारी शुभकामना सन्देश एवं सार्वजनिक अपीलको एक-एक शब्द र भावलाई म र मेरो नेतृत्वमा रहेको संगठन पूर्णतः समर्थन एवं हृदयंगम गर्दै श्री ५ मौसुफ सरकारको दिशा निर्देश, समयको माग, देश र जनताको आवश्यकता अनुसार सम्भव हर तवरले बलिदानीपूर्ण साथ सहयोगको वचनवद्धता व्यक्त गर्दछौं ।
कहालीलाग्दो, इतिहास कै कालो कालखण्डको रुपमा स्थापित हाल नेपाल, नेपाली, नेपालीपना, नेपालीत्त्वको वास्तविक अवस्था हामी सबैलाई थाहा नै छ ।
म र मेरो नेतृत्वमा रहेको संगठन वर्तमानका सम्पूर्ण बेथितिका विरुद्ध वर्षौं देखि अनवरत संघर्षरत रहेको तथ्य सर्वविदित नै छ र विद्यमान बेथितिको समुल नष्ट नभए-नगरे सम्म संघर्षरत नै रहने अकाट्य तथ्य हो ।
त्यसकारण,
राष्ट्रिय पहिचान कायम गर्न, ऐतिहासिक धरोहरहरु को रक्षा, राष्ट्रिय एकता, राष्ट्रिय स्वाधीनताको रक्षा, स्वतन्त्रता, मौलिक अधिकार, लोकतन्त्र-प्रजातन्त्र-जनतन्त्रको रक्षा, मौलिक मौलिकता-धर्म-संस्कृति-संस्कार-परम्परा-इतिहास को पुनःस्थापना सहित रक्षाको साथसाथै विद्यमान फासीवादी दलाल भ्रष्ट पराधिन लम्पसारवादी ब्यक्तिवादी परिवारवादी गिरोहवादी लूटतन्त्र लगायतको विद्यमान सम्पूर्ण बेथितिको समुल अन्त्य र सुनौलो बिहानीको लागि श्री ५ महाराजाधिराज सरकारको नेतृत्वमा देश र जनताको भाग्य भविष्यको सुनिश्चितताका लागि तत्काल “सम्पूर्ण क्रान्ति र पूर्ण मुक्ति” को नाराका साथ शान्तिपूर्ण निर्णायक आन्दोलनमा होमिन सम्पूर्ण आम देशभक्त राष्ट्रवादी मुक्ति कामी जनतन्त्र प्रेमी नेपाली मन र जनमा हार्दिक अनुरोधका साथ सार्वजनिक अपील गर्दछौं ।
“हामी नेपाली रहौंला कहाँ नेपालै नरहे !”
“धर्मो रक्षति रक्षित: । राष्ट्रो रक्षति रक्षित: ।।”
जय जय गोरक्ष जय जय काली, हिन्दु अधिराज्य यसै पालि ।।
वैदिक सनातन हिन्दु अधिराज्य नेपाल आमाको जय ।।
देशभक्तिपूर्ण मुक्ति अभिवादन सहित !
डा. मनोज मुक्ति “विवेक”
(डा. मनोज कुमार झा)
राष्ट्रिय संयोजक
राष्ट्रिय नागरिक आन्दोलन एवं राष्ट्र बचाउ अभियान
मिति :- २०८१/११/०७ गते बुधबार रोज ४ शुभम ।।
