खेलकुद

मैत्रीपूर्ण फुटबलमा ब्राजिलको जित

मैत्रीपूर्ण फुटबलमा ब्राजिल विजयी भएको छ । मंगलबार राति ब्राजिलले चेक रिपब्लिकलाई ३–१ गोल अन्तरले पराजित गरेको हो । पहिलो हाफमै रिपब्लिकले सुरुवाती अग्रता लिए पनि जोगाउन भने असफल भयो । रिपब्लिकका लागि डेभिड पेब्लिकाले गोल गर्दै ३७ औं मिनेटमा अग्रता दिलाएका थिए । पहिलो हाफमा १ गोलले पछि परेको ब्राजिलले दोस्रो हाफमा ३ गोल थपेको थियो । जसमा रोबर्टो फिरमिनोले एक तथा ग्याब्रियल जेससले २ गोल गरेका थिए ।

४९ औं मिनेटमा रोबर्टो फिरमिनोले गोल गर्दै खेल बराबरीमा ल्याएका थिए । तर अन्तिम ७ मिनेट सम्हालिन नसक्दा चेक रिपब्लिक ब्राजिलसँग हार्न पुग्यो । जेससले ८३ औं र ९० औं मिनेटमा लगातार दुई गोल गरेपछि ब्राजिल अन्ततः ३–१ गोल अन्तरले विजयी भयो ।

मंगलबार रातिको अन्य मैत्रीपूर्ण फुटबलमा जापान, कोरिया, नाइजेरिया, सेनेगल, अर्जेन्टिना लगाएतका देशहरु  पनि विजयी भएका छन् । अर्जेन्टिनाले मोरक्कोमाथि १–० को जित निकालेको छ । लियोनल मेस्सी नखेलको खेलमा अर्जेन्टिनाको जितमा ८३ औं मिनेटमा एन्जेल कोरेराले गोल गरेका थिए ।  यसैगरी जापानले बोलिभिया माथि १–० को जित निकाल्दा कोरियाले कोलम्बियामाथि २–१ को जित निकाल्यो ।
 

नेपाललाई ३-१ ले हराउँदै फेरि उचाल्याे भारतले साफ महिला च्याम्पियनसिपकाे उपाधि

माेरङ – नेपाललाई ३-१ गाेल अन्तरले हराउँदै भारतले  साफ महिला च्याम्पियनसिपको उपाधि जितेकाे छ । फाइनलमा नेपाललाई हराउँदै भारतले लगातार पाँचौं उपाधि जितेको हो । यसअघि भएका चारवटै संस्करणमा भारत च्याम्पियन बनेको थियो । नेपालको उपाधि अभियानमा भारत सँधै बाधक बन्दै आएको थियो । घरेलु मैदान विराटनगरमा भएको यो संस्करणमा पनि नेपालले नयाँ इतिहास रच्न सकेन ।

सुरुदेखि नै आक्रामक फुटबल खेलेको नेपालले  गोल गर्ने अवसर जुराउन सकेन । खेलमा भारतले पहिलो अग्रता लियो । २६औं मिनेटमा हिरा कुमारी भुजलेले फल गरे पछि पाएको फ्रीकिकलाई डालिमा छिब्बरले उत्कृष्ट गोल गरेकी थिइन् । एक गोलले पछि परेको ६ मिनेट पछि नै नेपाल खेलमा फर्किएको थियो । प्रत्येक खेलमा गोल गरेकी सावित्रा भण्डारीले भारतविरुद्ध ३२ औं मिनेटमा हेडर गोल गर्दै नेपाललाई फर्काउन सफल भइन् । त्यसपछि पनि सावित्राले एउटा राम्रो मौका पाएकी थिइन् । तर भारतीय गोलकिपरको उत्कृष्ट बचाउ गरेपछि नेपालले अग्रता लिने मौका गुमायो ।

भारतविरुद्ध नेपालको डिफेन्स निकै कमजोर थियो । फस्वरुप ६२औं मिनेटमा डिफेन्सकै तालमेलको आभावको मौकामा सन्ध्या रंगनाथनको पासमा ग्रेस दाङमेईले वन भर्सेस वनमा नेपाली गोलकिपरलाई बिट गदै २–१ को अग्रता दिलाइन् । ७८औं मिनेटमा भारतले अर्को गोल गर्‍यो । यस पटक भारतका लागि अन्जु तामाङले गोल गरिन् । त्यसपछि नेपालको खेलमा फर्किने प्रयास असफल भयो । यस क्रममा सावित्रा भण्डारीले गोल गर्ने मौका गुमाइन् ।

साफ महिला च्याम्पियनशिप जितेमा प्रत्येक खेलाडीलाई २ लाख दिने प्रदेश १ सरकारको घोषणा

काठमाडौं । साफ महिला च्याम्पियनसीप जिते प्रत्येक खेलाडीलाई २ लाख र उपविजेता बने प्रत्येक खेलाडीलाई १ लाख दिने प्रदेश- १ सरकारले घोषणा गरेको छ । साफ महिला च्याम्पियनसीपको उपाधिका लागि आज नेपाल र भारत भिड्दैछन् । बिराटनगरमा हुने खेलको पूर्वसन्ध्यामा प्रदेश सरकारले नगद पुरस्कारको घोषणा गरेको हो ।

 पाँचौँ साफ महिला फुटबल प्रतियोगिताको फाइनल खेल आज (शुक्रबार) हुँदै छ । फाइनलमा यसपटक पनि नेपालले भारतलाई नै आफ्नाे प्रतिद्वन्दी पाएकाे छ । हालसम्मका साफ महिला फुटबलमा नेपालले चौथोपटक फाइनल खेल खेल्दै छ । यद्यपि प्रत्येक पटकको फाइनलमा भारतलाई नै प्रतिस्पर्धीका रुपमा पाएको नेपालले हालसम्म उपाधि भने जित्न सकेकाे छैन । यस पटक पनि उपाधि सुरक्षित गर्ने होडमा अन्तिम लडाइँ भारतसँगै लड्नुपर्ने भएको छ र साे लडाइँमा जित हात पार्न सके नेपालले इतिहास नै रच्नेछ । 

कुवेतसँगको मैत्रीपूर्ण खेलका लागि नेपाली टोली आज कुवेत जाँदै

काठमाण्डौ – मार्च २१ तारिखमा कुवेतविरूद्दको मैत्रीपूर्ण खेलका लागि नेपाली फुटबल टाेली मंगलबार कुवेत प्रस्थान गर्देछ । राष्ट्रिय टिमको नयाँ प्रशिक्षकका रूपमा नेपाल आएका योहान कालीनले साेझै २३ सदस्यीय नेपाली टोली छनोट गरेका थिए । 

राष्ट्रिय टिममा रहेका मुख्य खेलाडी यू–२३ च्याम्पियनसिपको छनोटमा भएकाले प्रशिक्षकले नयाँ खेलाडीलाई मौका दिएका हुन् । यसपटक टिममा आशिष लामा पहिलोपटक क्याम्पमा परेका छन् भने टंक बस्नेत, अजित भण्डारी, सुरज विक, रवि सिलवाल, सरोज दाहाल, सन्तोष तामाङ, रवि पासवान, राष्ट्रिय टोलीमा कमब्याक गरेका छन् ।

तर टिमका मुख्य खेलाडी मानिएका अजित भण्डारी, सुरज विक, रवि सिलवाल, सरोज दाहाल ६ खेलाडी टिममा हुने छैनन् । चोटका कारण मैदान बाहिर रहेका विक्रम लामा, रञ्जित धिमाल, रन्जन विष्ट र सुमन लामा पनि टिममा फर्किएका छन् । कुवेतविरूद्दको मैत्रीपुर्ण खेल नेपाली प्रशिक्षक योहान कालीनका लागि पहिलो खेल हुनेछ ।

यस्ताे छ नेपाली टिमः

गोलरक्षकः किरण चेम्जोङ, विकेश कुथु, विशाल श्रेष्ठ

डिफेन्डरः सुरज विक, रवि सिलवाल,विराज महर्जन, देवेन्द्र तामाङ, अजित भण्डारी, रञ्जिलत धिमाल, सरोज दाहाल

मिडफिल्डरः सुमन लामा, विक्रम लामा, सन्तोष तामाङ, विशाल राई, हेमन गुरुङ, सुजल श्रेष्ठ, रवि पासवान, टंक बस्नेत

फरवार्डः आशिष लामा, भरत खवास, नवयुग श्रेष्ठ, रन्जन विष्ट र विमल राना

इनरुवामा बैशाख दोस्रो साताबाट ‘टी टेन’ क्रिकेट प्रतियोगिता हुँदै

इनरुवा । एकपछि अर्को ठूला खेलहरु आयोजना हुँदै आएको इनरुवा नगरपालिकामा पूनः राष्ट्रिय स्तरको प्रतियोगिता आयोजना हुने भएको छ । सुनसरी युथ क्लव इनरुवाले बैशाख १४ गतेबाट इनरुवा खेल मैदानमा राष्ट्रिय स्तरको त्रिकेट प्रतियोगिता संचालन गर्न लागेको हो । इनरुवा नगरपालिकामा आज पत्रकार सम्मेलनको आयोजना गरी क्लबका अध्यक्ष अफजल हुसेनले प्रतियोगिताको मिति सार्वजनिक गरेका हुन् ।

अघिल्लो वर्ष सुनसरी प्रिमियर लिग टी२० क्रिकेट प्रतियोगिता आयोजना गरेको सुनसरी युथ क्लबले यस पटकबाट भने प्रतियोगिताको मोडेल परिवर्तन गर्दै टी १० क्रिकेट आयोजना गर्न लागेको हो । डे–नाइट प्रतियोगिताका रुपमा खेलाइन लागेको टी१० क्रिकेट राष्ट्रिय स्तरको पहिलो प्रतियोगिता हुने आयोजकको दाबी छ । प्रतियोगिताकालागि मैदानमा अन्र्तराष्ट्रिय स्तरको लाइटको बन्दोवस्ती मिलाइने आयोजकले जनाएको छ ।

प्रतियोगिताको मिति सार्वजनिक कार्यक्रममा इनरुवा नगरपालिकाका प्रमुख राजन मेहता, कोशी गाउँपालिका अध्यक्ष ऐयुब अन्सारी, हरिनगर गाउँपालिका अध्यक्ष गफार अन्सारी सहित नगरभित्र क्रियाशिल संस्था आवद्ध प्रमुख तथा प्रतिनिधि लगायतको उपस्थिती रहेको थियो । उक्त प्रतियोगितामा आयोजक सुनसरी युथ क्लब सहित विभागीय टीमहरु नेपाल प्रहरी र नेपाली सेनाका साथै प्रदेशस्तरीय क्लबको सहभागिता रहने बताइएको छ । प्रतियोगिताको बिजेताले नगद २ लाख र ट्रफि पाउने छ भने उपबिजेता टिमले १ लाख पुरस्कार पाउने आयोजक संस्थाका अध्यक्ष हुसेनले जानकारी दिए । कार्यक्रममा सहभागिबीच होलीको शुभकामना समेत आदानप्रदान गरिएको थियो ।

महिला टि–२० क्रिकेट लिग : चर्चित अभिनेत्री रेखा थापाले पनि खरिद गरिन क्रिकेट टोली

काठमाडौं। नेपालमा पहिलो पटक आयोजना हुन लागेको एनसीएल महिला टी–२० प्रतियोगिताका चार टिमका मालिक र मार्की खेलाडीको घोषणा भएको छ । यसैबीच नेपालकी चर्चित अभिनेत्री रेखा थापाले महिला लिगका लागि टिम खरिद गरेकी छिन ।

अभिनेत्री थापाले महिला क्रिकेट २० प्रतियोगिताका लागि काठमाडौं सुपर च्याम्पियन्स टिमको स्वामित्व खरिद गरेकी हुन । सोमबार राजधानीमा पत्रकार सम्मेलनका दौरान अभिनेत्री थापाले “आफू १४ वर्षदेखि महिला दिदी बहिनीहरुको क्षेत्रमा काम गर्दै आएको र अब नेपाली महिला क्रिकेटरहरुको बिकास गर्नुका साथै नेपाली महिला क्रिकेटलाई एक उचाईमा पुर्याउन आफ्नो तर्फबाट उल्लेख योगदान दिनका निमित्त महिला टिम खरिद गरेको बताउनु भयो ।

आयोजकले प्रस्ताव टिम खरिद गर्न प्रस्ताव गरेकाले मैले पनि महिला क्रिकेटमा योगदान दिन सक्छु भन्दै काठमाडौंको टिम खरिद गरेको उहाँको भनाइ छ । एनसीएल स्पोर्टस् प्रालिको आयोजनामा पहिलोपटक महिला टि–२० क्रिकेट लिग हुन लागेको हो ।

नेपाली महिला टोलीले अन्तर्रा्ष्ट्रिय प्रतियोगितामा प्राप्त गरेको सफलतालाई निन्तरता दिन र अझै प्रतिष्पर्धी बनाउनका लागि प्रतियोगिताको आयोजना गरिएको प्रालिका अध्यक्ष जयराज रायको भनाइ छ । रायले मुलुकभित्र हुने अधिकांश प्रतियोगिता पुरुष खेलाडीका लागि मात्र केन्द्रित रहँदै आएकाले सो सँगै महिला क्रिकेटरलाई अघि बढाउने उद्देश्यसाथ प्रालिले महिला टि–२० लिग आयोजना गर्न लागेको बताउनु भयो ।

यसअघि चैत १ देखि ९ गतेसम हुने भनिएको प्रतियोगिता एक साता परसर्दै ७ गते देखि १४ गतेसम्म आयोजना हुन लागेको हो । विराटनगरस्थित बैजनाथपुरको क्रिकेट रंगशालामा हुने प्रतियोगितामा देशका चार शहरका टिमहरुको सहभागिता रहनेछ ।

सोमबार आयोजना गरिएको पत्रकार सम्मेलनमा महिला टी–२० लिगमा सहभागी हुने चार टिम, टिम मालिक र मार्की खेलाडी घोषणा समेत गरिएको थियोे । काठमाडौं सुपर च्याम्पियन्समा नेरी थापा मार्की खेलाडीको रुपमा भित्रिएकी छिन । यता विराटनगर रोअरिङको स्वामित्व अनुप सक्सेराले लिएको छन ।

विराटनगरको मार्की खेलाडीमा करुणा भण्डारी चुनिदा भैरहवा क्विन्सको स्वामित्व अनिल भण्डारी र दीपक सुवेदीले लिएका छन भने राष्ट्रिय टिमकी कप्तान रुबिना क्षेत्री भैरहवाको मार्की खेलाडी भएकी छिन ्। त्यस्तै टिम धनगढी वन्डरवुमेनको स्वामित्व हरि खनालले लिएका छन भने टिमको मार्की खेलाडीमा सीता रानामगर चुनिएकी छिन् । प्रतियोगिताका लागि राष्ट्रिय अन्तर्राष्ट्रिय र स्थानीय खेलाडी भित्र्याउन अक्सनको मिति छिट्टै घोषणा गरिने आयोजक संस्था एनसीएल स्पोर्टस प्रालिले जनाएको छ ।

प्रतियोगितामा सहभागी हुने नेपाली अन्तर्रा्ष्ट्रिय, राष्ट्रिय र स्थानीय खेलाडीलाई तीन ग्रेडमा विभाजन गरिएको छ । ए ग्रेडका खेलाडीले न्युनतम चालीस हजार र अधिकतम ७५ हजार प्राप्त गर्ने छन् भने बी ग्रेडका खेलाडीले २५ हजार र अधिकतम ५० हजार पाउने छन् । त्यस्तै सी ग्रेडका खेलाडीले न्युनतम १५ हजार र अधिकतम २५ हजार प्राप्त गर्ने छन् । प्रतियोगिताका विजयी टोलीले नगद १० लाख जित्ने छ भने दोश्रो हुने टोलीले पाँच लाख नगद हात पार्ने छ । त्यस्तै प्रत्येक खेलमा प्लेयर हुने खलाडीले १० हजार पनि प्राप्त गर्ने छन् ।

माईभ्याली गोल्डकप: झापालाई पराजित गर्दै हिमालयन शेर्पा फाइलनमा

इलाम – इलाममा जारी पाँचौ अन्तर्राष्ट्रिय आमन्त्रण माईभ्याली गोल्डकपको फाइनलमा हिमालयन शेर्पा क्लब काठमाण्डाैले आफ्नो स्थान पक्का गरेको छ । आइतबार भएको अन्तिम सेमिफाइनलमा मेची नेत्रालय झापालाई ३–० गोलको अन्तरले हराउँदै हिमालयन शेर्पा उपाधि नजिक पुगेको हो ।

हिमालयन शेर्पालाई उपाधि नजिक पुर्‍याउन १७ नम्बरका त्रिदेव गुरुङ, ४ नम्बरका रवि थापा र १३ नम्बरका विशन गुरुङको गोलकाे योगदान रह्यो । जितसँगै हिमालयनले उपाधिका लागि मंगलबार हुने फाइनलमा विदेशी टिम दाउफिन्स क्लब क्यामरुनसँग खेल्नेछ । 

दाउफिन्स यसअघिको सेमिफाइनलमा नेपाल पुलिस क्लबलाई हराउँदै फाइनलमा प्रवेश गरिसकेको थियाे । पहिलो हाफमा नै अग्रता लिएको हिमालयन शेर्पाले दोस्रो हाफमा अग्रता तेब्बर बनाउँदै जित निश्चित गरेको थियो ।

सुरुवातदेखि नै मेची नेत्रालय काँकडभिट्टालाई दबाबमा राखेको हिमालयन शेर्पाले पहिलो हाफको इन्जुरी समयमा अग्रता लिएको हो । कर्नरको अवसरलाई सदुपयोग गर्दै हिमालयन शेर्पाका त्रिदेव गुरुङले हेडरमार्फत गोल गरी टिमलाई अग्रता दिलाउँदै फाइनलमा पुग्न सफल भएको हो । हिमालयनले खेल सुरु भएको ६२ औं मिनेटमा रवि थापाले पेनाल्टी क्षेत्रबाट गरेको प्रहार गोलमा परिणत भएको थियो ।

दोश्रो हाफको इन्जुरी समयमा विशन गुरुङले गोल गर्दै टिमलाई ३–० को जित निकाल्दै उपाधि नजिक पुर्‍याएका हुन् । २१ नम्बरका पाडरिक प्रिभाडेको गोहाको पासलाई गुरुङले गोलमा रुपान्तरण गरेका थिए । 

खेलको म्यान अफ दि म्याच विजेता टिम हिमालयन शेर्पाका गोलरक्षक किशोर गिरी भएका छन् । उनले नगद १० हजार र ट्रफी पाए । खेल माईभ्याली फुटबल क्लब इलामको आयोजनामा फागुन २६ गतेदेखि सञ्चालित भएकाे हाे । प्रतियोगिताका विजेताले नगद ७ लाख र उपविजेताले ४ लाख रुपैयाँ पुरस्कार पाउने छन् । त्यस्तै उत्कृष्ठ खेलाडीले मोटरसाइकल प्राप्त गर्नेछन् भने सर्वाधिक गोलकर्ताले नगद २५ हजार रुपैयाँ पाउनेछन् ।

साफ महिला च्याम्पियनसिप फुटबलकाे सेमिफाइनलमा पुग्ने चार टोलीको टुंगो लाग्याे

माेरङ  – विराटनगरमा जारी साफ महिला च्याम्पियनसिप फुटबलमा सेमिफाइनलमा पुग्ने चार टोलीको टुंगो लागेको छ । शुक्रबार माल्दिभ्स श्रीलंकासँग २–० गोल अन्तरले पराजित भएसँगै प्रतियोगिताबाट बाहिरिने दोस्रो टिम भएको छ ।

यसअघि समूह ए बाट भुटान दुई खेलमा पराजित हुँदै प्रतियोगिताबाट बाहिरिएको थियो । सेमिफाइनलमा समूह ए बाट नेपाल र बंगलादेश तथा समूह बी बाट भारत र श्रीलंका अन्तिम चारमा प्रवेश गरेका हुन् । सेमिफाइनलमा पुग्ने चार टिमको टुंगो लागे पनि समूह विजेता र उप विजेताको भने समूह चरणको अन्तिम खेलबाट हुने छ ।

विराटनगरको शहीद रंगशालामा शुक्रबार भएको खेलमा माल्दिभ्सकी कप्तान फदवा जाहिरले डि बक्सबाहिर हातले बल छोएपछि श्रीलंकाले फ्रिकिक पाएको थियो । ४० औं मिनेटमा रिवान्गी लियोनागेले प्रहार गरेको फ्रिकिक रिबाउन्ड भएपछि सालिनी इकानायकले गोल गर्दै अग्रता बनाइन् ।

पहिलो हाफमा १ गोल गरेको श्रीलंकाले दोस्रो हाफमा पनि थप एक गोल गरेको थियो । ४९ औं मिनेटमा सालिनीले व्यक्तिगत दोस्रो गोल गर्दै अग्रता समेत दोब्बर बनाइन् । त्यसपछि थप गोल नभएपछि श्रीलंका माल्दिभ्सविरुद्ध २–० गोलको जित निकाल्न सफल भयो । प्रतियोगिता अन्तर्गत शनिबार नेपाल र बंगलादेशबीच  खेल हुने छ  ।

पाकिस्तान क्रिकेट बोर्डले भारतविरुद्ध उजुरी गर्‍याे

काठमाण्डौ – पाकिस्तानी क्रिकेट बोर्ड पीसीबीले भारतीय टिमविरुद्ध अन्तर्राष्ट्रिय क्रिकेट परिषद आईसीसीमा उजुरी गरेको छ । गएको शुक्रबार भएको अष्ट्रेलियासँगको तेस्रो एकदिवसीय क्रिकेट खेल्ने क्रममा भारतीय खेलाडीले सैनिकको टोपी लगाएकोमा आपत्ति जनाउँदै पीसीबीले भारतीय टिमलाई कारबाही माग गर्दै आईसीसीमा लिखित उजुरी गरेको हो । 

पीसीबीका अध्यक्ष एस्सान मणीले भारतीय खेलाडीलाई सेनाको टोपी लगाउन लगाएर भारतले क्रिकेटमा राजनीति प्रवेश गराएको दाबीसहित कारबाहीका लागि निवेदन दिएको बताएका छन् । उनले आईसीसीलाई अर्को पनि पत्र पठाउने तयारी रहेको जानकारी पनि दिएका छन् । 

भारतले फ्रेब्रुअरी १४  तारिखमा काश्मिरमा आतंकबादी हमलामा मारिएका सुरक्षाकर्मीको सम्मानमा खेलाडीले यस्तो टोपी लगाएको बताएको छ । तर, आईसीसीका प्रवक्ताले भारतीय क्रिकेट बोर्ड बीसीसीआईले खेल अघि यसबारे आईसीसीलाई जानकारी गराएको र आईसीसीले यसको अनुमति दिएको बताएको बीबीसीले जनाएको छ । च्यारिटीमार्फत रकम संकलनका लागि यस्तो अनुमति दिइएको आईसीसीको भनाई छ । 

तर, पीसीबीले यसअघि इग्ल्याण्डका खेलाडी मोइन अलीले सन् २०१४ मा भारतसँगको खेलमा सेभ गाजा र फ्री प्यालेष्टाइन लेखेको आर्मब्याण्ड लगाउन नदिइएको तथा सन् २०१७ मा दक्षिण अफ्रिकाका इमरान ताहिरले धार्मिक प्रवचक जुनैद जम्सेदको टीसर्ट देखाएबापत आईसीसीले अनुशासनको कारबाही गरेको उदाहरण दिँदै भारतलाई बेग्लै खालको ब्यवहार नगर्न ध्यानाकर्षण गराएको अध्यक्ष मणीले बताएका छन् । 

भारतीय सेनाका मानार्थ कर्णेल समेत रहेका भारतीय टिमका पुर्व कप्तान महेन्द्रसिंह धोनीले मैदानमा खेलाडीलाई सेनाको टोपी वितरण गरेका थिए । 

साफ महिला च्याम्पियनसिप फुटबल प्रतियोगिता आजदेखि, उद्घाटन खेलमा नेपाल र भुटान खेल्ने

मोरङ – साफ च्याम्पियनसिप महिला फुटबल प्रतियोगिता मंगलबारदेखि विराटनगरमा सुरु हुँदैछ । प्रतियोगिता विराटनगरको शहीद रंगशालामा हुनेछ । महिला फुटबल प्रतियोगिताका सम्पुर्ण तयारी पूरा भएको एन्फाले जनाएको छ । मंगलबार दिउँसो एक कार्यक्रमको आयोजना गरी प्रतियोगिता सुरु गर्न लागिएको छ । 

प्रतियोगितामा सहभागी टिमका कोचसहित क्याप्टेनको उपस्थितिमा सोमबार विराटनगरमा पत्रकारसम्मेलन गर्दै अखिल नेपाल फुटबल संघ (एन्फा) ले ट्रफीसमेत सार्वजनिक गरिसकेको छ ।दिउँसो २ बजे उद्घाटन कार्यक्रमको आयोजना गरिएको छ ।  तर पहिलो उद्घाटन खेल भने ३ बजे पछि सुरु हुने आयोजकले जनाएको छ ।

प्रतियोगितामा नेपालसहित भारत, श्रीलंका, भुटान, माल्दिभ्स, बंगलादेशका टिमहरु सहभागी हुँदैछन् ।  अहिले  ६ वटै देशका राष्ट्रिय टिमहरु विराटनगर आइसकेका छन् । प्रतियोगिताको उद्घाटन नेकपाका अध्यक्ष पुष्पकमल दाहालले गर्ने कार्यक्रम रहेको छ । साफ महिला च्याम्पियनसिपको पाचौँ संस्करणसम्म आइपुग्दा नेपाल र भूटान दुई पटक आमनेसामने भएका छन् । जसमा नेपालले दुवै खेलमा जित हात पारेको छ ।

बिशेष समाचार

निर्मला हत्या प्रकरणको एक वर्ष, दोषी पत्ता लगाउन सरकार असफल

मकवानपुरमा भीषण वर्षा, बाटो अबरुद्ध, गाडीलाई खोलाले बगायो

दोलखामा कारागारभित्रै कैदीकाे मृत्यु, आत्महत्याकाे आशंका

%d bloggers like this: