श्री ५ ज्ञानेन्द्र वीर विक्रम शाहदेव, आफ्नी महारानी श्री ५ कोमल शाहदेवी र अधिराजकुमारी प्रेरणा शाहदेवीसहित पवित्र भूमि दाङको तुलसीपुरमा शनिबार राजकीय रूपमा पधार्नुभएको छ।
तुलसीपुरको ऐतिहासिक वीरेन्द्र चोकमा पुगेर श्री ५ वीर विक्रम शाहदेवले आफ्ना दिवंगत पूज्यनीय दाजु, प्रजाप्रेमी श्री ५ वीरेन्द्र वीर विक्रम शाहदेवको सालिकमा माल्यार्पण गर्दै दिवंगत आत्माको चिरशान्तिका निम्ति श्रद्धाञ्जलि अर्पण गर्नुभयो।
तदुपरान्त, श्री ५ ज्ञानेन्द्र वीर विक्रम शाहदेवले होटेल वेष्टर्न प्यालेसको प्राङ्गणमा उपस्थित प्रजा, श्रद्धालुजन र शुभचिन्तकहरूसँग आत्मीय भेटघाट गर्नुभयो। उहाँको दर्शन र उपस्थितिमा उत्साहित शुभेच्छुकहरूले “श्री ५ को जय!” नाराका साथ राजभक्ति प्रकट गरेका थिए।
उहाँले सोही दिन घोराही उपमहानगरपालिका-५ स्थित पाण्डबेश्वर महादेव मन्दिरमा पुगेर विशेष पूजा-अर्चना गर्नुभयो। यस मन्दिर परिसरमा केही वर्षअघि विश्वकै अग्लो त्रिशूल स्थापना गरिएको थियो, जसको दर्शन र आराधना गर्दै श्री ५ ज्ञानेन्द्र शाहदेवले राष्ट्रको शान्ति, समृद्धि र प्रजाको कल्याणका निम्ति प्रार्थना गर्नुभएको थियो।
पूजा-पाठ सम्पन्न गरेपछि श्री ५ ज्ञानेन्द्र शाहदेवले घोराही हुँदै लमहीतर्फ प्रस्थान गर्ने कार्यक्रम रहेको छ। यस राजकीय भ्रमणको सम्पूर्ण व्यवस्थापन पूर्व सांसद गंगा चौधरीले नेतृत्व गर्दै, जिल्ला सवारी संयोजकको हैसियतमा गरिरहनुभएको छ।
श्री ५ को आगमनले दाङको वातावरणमा नयाँ ऊर्जा र उत्साह छाएको छ भने उहाँको महादर्शनका लागि उपस्थित जनसाधारणमा अपार श्रद्धा र उत्सुकता देखिएको छ। “श्री ५ को जय!” आवाजले तुलसीपुर क्षेत्र गुञ्जायमान भएको थियो।
